இபிஎஃப்ஓ-வில் 2023-24-ம் ஆண்டில் நிதி கோரிய 30.49 லட்சம் மனுக்களுக்கு தீர்வு

சென்னை: தொழிலாளர் வருங்கால வைப்பு நிதி நிறுவனத்தின் (இபிஎஃப்ஓ) சென்னை மற்றும் புதுச்சேரி மண்டல அலுவலகத்தின் சார்பில், 2023-24-ம்நிதி ஆண்டில் 30.49 லட்சம் நிதி கோரிக்கை மனுக்களுக்கு தீர்வு காணப்பட்டுள்ளது.

தொழிலாளர் வருங்கால வைப்புநிதி நிறுவனத்தின் சென்னை மற்றும் புதுச்சேரி மண்டல அலுவலகத்தின் கீழ், தமிழகத்தில் 10 அலுவலகங்களும், புதுச்சேரி யூனியன் பிரதேசத்தில் 2 அலுவலகங்களும் உள்ளன. இந்த அலுவலகங்களில் 79,433 நிறுவனங்களில் பணிபுரியும் 2.05 கோடி சந்தாதாரர்கள் உள்ளனர்.

இங்கு 2023-24-ம் நிதி ஆண்டில் 30.49 லட்சம் நிதி கோரிக்கை மனுக்களுக்கு தீர்வு காணப்பட்டுள்ளது. இது முந்தைய நிதியாண்டை விட 2.74 லட்சம் மனுக்கள் அதிகம் ஆகும்.

இதேபோல், 2023-24-ம் ஆண்டில் 16,062 புதிய ஓய்வூதியதாரர்கள் சேர்க்கப்பட்டுள்ளனர். இது முந்தைய ஆண்டுடன் ஒப்பிடும்போது கிட்டத்தட்ட இரு மடங்காகும். இபிஎஃப்ஓ சென்னை மற்றும் புதுச்சேரி மண்டலம் மொத்தம் 3.14 லட்சம் ஓய்வூதியதாரர்களுக்கு சேவை செய்கிறது.

2022-23-ம் ஆண்டில், கட்டணம் செலுத்த தவறிய நிறுவனங்களிடம் இருந்து நிலுவைத் தொகையாக ரூ.16.14 கோடி வசூலிக்கப்பட்டிருந்த நிலையில், 2023-24-ம் ஆண்டில் ரூ.275.32 கோடி வசூலிக்கப்பட்டுள்ளது.

குறைகள் தொடர்பான விஷயங்களில் இந்த மண்டலத்தில், 2022-23-ம் ஆண்டு 81,769 குறைகள் தீர்த்து வைக்கப்பட்டிருந்த நிலையில், இந்த நிதி ஆண்டில் 97,396 உறுப்பினர்கள், ஓய்வூதிய தாரர்களின் குறைகள் தீர்த்து வைக்கப்பட்டுள்ளன.