மணிலா: கரோனா பெருந்தொற்றின் தாக்கத்தின் காரணமாக ஆசியாவின் வளரும் நாடுகளில் கடந்த ஆண்டு 7 கோடி பேர் கடுமையான வறுமையில் வாடியதாக பிலிப்பைன்ஸை மையமாகக் கொண்ட ஆசிய வளர்ச்சி வங்கி தெரிவித்துள்ளது.
இது தொடர்பாக ஆசிய வளர்ச்சி வங்கி அண்மையில் வெளியிட்ட அறிக்கையில் சில முக்கிய புள்ளி விவரங்கள் வெளியாகியுள்ளது. அதன்படி, கடந்த 2022-ஆம் ஆண்டு ஆசியாவின் வளரும் நாடுகளில் 15.5 கோடி மக்கள் கடுமையான வறுமையில் சிக்கினர். இவர்களில் 6.78 கோடி பேர் கரோனா தாக்கம் வராவிட்டால் வறுமையில் சிக்கியிருக்க மாட்டார்கள். 2021-ல் மட்டும் கூடுதலாக 7.5 முதல் 8 கோடி மக்கள் வறுமைக்குள் தள்ளப்பட்டுள்ளனர் என்று அந்த அறிக்கையில் தெரிவிக்கப்பட்டுள்ளது.
ஒரு நாளில் 2.15 அமெரிக்க டாலர் அதாவது ( இந்திய மதிப்பில் கிட்டத்தட்ட ரூ.170) இல்லாமல் ஒருநாள் வாழ்க்கையை வாழ்பவர்கள் கடுமையான வறுமையில் இருப்பதாக உலக வங்கி வரையறுத்துள்ளது.
இந்நிலையில், ஆசியப் பிராந்தியத்தில் வளரும் நாடுகளில் நிலவும் வறுமையை ஒழிக்க எடுத்துவரும் பல்வேறு நடவடிக்கைகளுக்கும் மத்தியில் 2030-க்குள் இங்குள்ள மக்கள் தொகையில் 30.3 சதவீதம் பேர், அதாவது 120 கோடி பேராவது அன்றாடம் $3.65 - $6.85 செலவுக்குள் ஒரு நாளைக் கடத்தும் சூழல் உருவாகும் எனக் கணிக்கப்படுகிறது.
» இளைஞர்கள் மத்தியில் முத்திரை பதித்த ‘ஸ்டார்ட் அப்’ திருவிழா @ கோவை
» இ-வர்த்தகம் | பெரிய, சிறிய வர்த்தகர்கள் இடையே சமமான போட்டியை உறுதி செய்ய வேண்டும்: பிரதமர் மோடி
இதற்குத் தீர்வாக, வளர்ந்துவரும் ஆசிய நாடுகள் (46 நாடுகளை உள்ளடக்கியது) தத்தம் நாடுகளில் சமூக நலத் திட்டங்களை வலுப்படுத்த வேண்டும், உட்கட்டமைப்பில் கவனம் செலுத்த வேண்டும், தொழில்நுட்ப புதுமைகளை ஆதரிக்க வேண்டும் என்று ஆசிய வளர்ச்சி வங்கியானது தெரிவித்துள்ளது.