ஹரிலாலுக்குப் புரியாத காந்தி!

காந்தியால் தேர்வுசெய்யப்பட்டு லண்டனுக்கு அனுப்பி வைக்கப்பட்ட மாணவன் படிப்பை பாதியில் கைவிட்டு ஓடிப்போன பின்னர் கிடைக்கப்பெறும் இரண்டாவது வாய்ப்பிலும் அவர் திறனும் அறிவும் கொண்ட மற்றொரு ஏழை மாணவனையே தேர்ந்தெடுக்கிறார். நூறாவது தடவையாக இருப்பினும் அப்படியொரு வாய்ப்புக்காகவே ஏங்கிக் காத்திருக்கும் ஹரிலால் அவரது நினைவுக்குக் கூட வர மாட்டார்.

பிடிவாத நேர்மை கொண்ட பிரபலமான தகப்பனுக்குப் பிறந்த உதவாக்கரை பிள்ளை ஹரிலால். காந்தியின் பிரபல்யத்தைப் பயன்படுத்திக்கொண்டு முன்னேறத் துடிக்கும்போதெல்லாம் காந்தியே முட்டுக்கட்டையாகிறார். எதனாலும் நிரப்ப முடியாத இடைவெளிகள் பெருத்துக்கொண்டே இருக்கின்றன. ஹரிலால் ஓர் அநாதையாகத் தான் சாக வேண்டியிருக்கிறது. ஹரிலால் இறக்கும் தருவாயில் அவரிடம் 'உன் தந்தை யார்?' எனக் கேட்கப்படுகிறது. அவர் 'காந்தி' என்கிறார். 'காந்தி நம் எல்லோருக்கும் தந்தை தான். உன் சொந்தத் தகப்பன் பெயர் என்ன?' எனக் கேட்கிறார்கள். காந்தி நம் அனைவருக்குமானவர் என்பதை உணர்ந்துகொள்ளாததுதான் ஹரிலாலின் ஊழ்.

மறக்க முடியாத படம்.