அண்ணா சாகேப் கிர்லோஸ்கர் 10

மராட்டிய நாடகத்துறை முன்னோடி

மராட்டிய இசை, நாடகத் துறை முன்னோடியும், இந்திய நாடகத் துறையில் புரட்சியை ஏற்படுத்தியவருமான அண்ணா சாகேப் கிர்லோஸ்கர் (Anna Saheb Kirloskar) பிறந்த தினம் இன்று (மே 31). அவரைப் பற்றிய அரிய முத்துக்கள் பத்து:

* மராட்டியப் பகுதியான பெல்காம் (தற்போது கர்நாடக மாநிலம்) அருகே குல்ஓசூர் என்ற கிராமத்தில் (1843) பிறந்தார். இயற்பெயர் பல்வந்த் பாண்டுரங்க கிர்லோஸ்கர். தந்தை பண்டிதர், சமஸ்கிருதக் கவிதைகள், நாடகங்களில் ஆர்வம் கொண்டவர். இதனால் மகனுக்கும் இந்த ஆர்வம் சிறு வயதிலேயே அரும்பியது.

* மராட்டி, சமஸ்கிருதம் பயின்றார். அவற்றில் புராணங்கள், இலக்கியம், வரலாறு, நாகரிகம் குறித்த ஏராளமான நூல்களைப் படித்தார். பள்ளிக்கல்விக்குப் பிறகு ஆங்கிலக் கல்வி பயிலவும், உயர்கல்விக்காகவும் புனேவுக்கு அனுப்பி வைக்கப்பட்டார். அங்கு நாடகங்களால் ஈர்க்கப்பட்டார். நாடகக் கலைஞர்கள், படைப்பாளிகளோடு நெருங்கிப் பழகினார்.

* சில நாடகங்களில் நடித்தார். படிப்பை பாதியில் நிறுத்திவிட்டு நாடகம் எழுத ஆரம்பித்தார். இது தந்தைக்குப் பிடிக்கவில்லை. அவரது வற்புறுத்தலால், மீண்டும் ஊர் திரும்பினார். பள்ளி ஆசிரியர், காவல் துறைப் பணி, வருவாய்த் துறை அலுவலகத்தில் குமாஸ்தா என பல ஆண்டுகள் பணியாற்றினார்.

* இதற்கிடையில், நாடகங்கள் எழுதியும், நடித்தும் வந்தார். இசையறிவு மிக்க இவர், இசை நாடகங்களையும் எழுதினார். ‘ஸ்ரீசங்கராச்சார்ய திக்விஜய்’ நாடகம்தான் இவரது முதல் இசை நாடகம். பின்னர் சில வரலாற்று நாடகங்கள், இசை நாடகங்கள் எழுதினார். சமஸ்கிருத காவியங்களை மராத்தியில் மொழிபெயர்த்து, நாடகங்களாக மாற்றினார்.

* ‘பாரத் சாஸ்த்ரோ தேஜக் மண்டலி’ என்ற நாடகக் குழுவை 1866-ல் தொடங்கி, தனது நாடகங்களை அரங்கேற்றினார். இது நல்ல வரவேற்பு பெற்றதால், ‘கிர்லோஸ்கர் சங்கீத நாடக் மண்டலி’ என்ற வர்த்தக ரீதியிலான நாடக கம்பெனி தொடங்கினார். இதில் முதல் நாடகமாக ‘சங்கீத் சாகுந்தலம்’ இசை நாடகத்தை அரங்கேற்றினார்.

* இந்த நாடகம் மாபெரும் வரவேற்பைப் பெற்றதுடன் வர்த்தக ரீதியாகவும் நல்ல வருமானம் ஈட்டித் தந்தது. இவரது நாடகங்களும், நாடகக் குழுவும் பெரிதும் பாராட்டுகளைப் பெற்றன. இதையடுத்து, வருவாய் ஆணையர் பதவியை ராஜினாமா செய்துவிட்டு முழு நேரமும் நாடகத் துறைக்கே அர்ப்பணித்தார்.

* இவர் எழுதி, நடித்த ‘சவுபத்ரா’ இசை நாடகத்தில் 100-க்கும் மேற்பட்ட இசைத் தொகுப்புகள் இடம்பெற்றிருந்தன. ‘சாகுந்தலம்’ நாடகத்தில் 198 இசைத் தொகுப்புகளைச் சேர்த்திருந்தார். இவை இந்துஸ்தானி, கர்னாடக இசையின் கலவையாக இருந்தன. இவரது நாடகக் குழு நாடு முழுவதும் நாடகங்களை நடத்தியது.

* மராட்டிய நாடகத் துறை இவரது காலகட்டத்தில் அபார வளர்ச்சி பெற்றது. நாடகக் கலையின் அழகியல் அம்சத்தை வளப்படுத்தினார். அண்ணா சாகேப் கிர்லோஸ்கர் என நேசத்தோடு அழைக்கப்பட்டார். அதுவே இவரது பெயராக நிலைத்துவிட்டது.

* இவர் எழுதி, இசையமைத்து, நடித்த அனைத்து நாடகங்களும் மகத்தான வெற்றி பெற்றன. இந்திய கலாச்சாரத்தை தன் நாடகங்கள் மூலம் சீரமைத்து மீட்டெடுத்தவர் என பாலகங்காதர திலகர் இவருக்குப் புகழாரம் சூட்டினார்.

* மராட்டிய இசை நாடகத் துறைக்கு நவீனத் தொழில் நுட்பங்களை அறிமுகம் செய்து வைத்தார். மராட்டிய நவீன நாடகத் துறைக்கு மகத்தான பங்களிப்பை வழங்கிய அண்ணா சாகேப் கிர்லோஸ்கர் 42-வது வயதில் (1885) மறைந்தார்.