இந்திய செஸ் கிராண்ட் மாஸ்டர்: விஸ்வநாதன் ஆனந்த் 10

உலகப் புகழ்பெற்ற செஸ் கிராண்ட் மாஸ்டர் விஸ்வநாதன் ஆனந்த் (Viswanathan Anand) பிறந்த நாள் இன்று (டிசம்பர் 11). அவரைப் பற்றிய அரிய முத்துக்கள் பத்து:

l மயிலாடுதுறையில் (1969) பிறந்தவர். தந்தை தெற்கு ரயில்வே பொது மேலாளராக இருந்தவர். கூர்மையான நினைவாற்றல் கொண்ட ஆனந்த் 6 வயது முதல், அம்மாவிடம் சதுரங்கப் பயிற்சி பெற்றார். சென்னை எழும்பூர் டான் பாஸ்கோ பள்ளியில் பயின்றார்.

l ஆனந்தை சிறு வயதிலேயே ‘டால்’ என்ற செஸ் கிளப்பில் சேர்த்தார் தாய். 14 வயதில் தேசிய சப்-ஜூனியர் சாம்பியன் பட்டம் வென்றார். 15 வயதில் அனைத்துலக மாஸ்டர் விருது பெற்றார். 1985-ல் தேசிய போட்டியில் சாம்பியன் பட்டம் பெற்றார்.

l லயோலா கல்லூரியில் பி.காம். பட்டம் பெற்றவர். 3-ம் ஆண்டு படிக்கும்போதே உலக அளவில் செஸ் தரவரிசை பட்டியலில் 5-வது இடத்தைப் பிடித்தார். இறுதித் தேர்வு எழுதுவதற்கு முன்பாகவே உலக சாம்பியன்ஷிப் போட்டிக்கான தகுதிச் சுற்றுப் போட்டிகளில் விளையாடத் தொடங்கினார்.

l 1987-ல் சர்வதேச ஜூனியர் போட்டியில் வென்று சாம்பியன் பட்டம் பெற்றார். இதன்மூலம் இப்பட்டத்தை வென்ற முதல் இந்தியர் என்ற பெருமை பெற்றார். கோவையில் 1988-ல் நடந்த சர்வதேச போட்டியில் வென்று இந்தியாவின் முதல் கிராண்ட் மாஸ்டரானார்.

l சர்வதேச போட்டிக்கு 1991-ல் முதன்முதலாக தகுதி பெற்றார். 1995-ல் அரையிறுதி வரையும், 1996-ல் பிசிஏ உலக சாம்பியன் போட்டியில் இறுதிச்சுற்று வரையும் முன்னேறினார். ஸ்விட்சர்லாந்தில் 1997-ல் நடந்த ஃபிடே (FIDE) உலக போட்டியில் இறுதிச்சுற்று வரை சென்றார்.

l 2000-ல் நடந்த சர்வதேச சாம்பியன்ஷிப் போட்டியில் ரஷ்யாவின் அலெக்ஸீ ஷிரோவை வீழ்த்தி உலக சாம்பியன் பட்டம் பெற்றார். இதன்மூலம் இந்தியாவின் புகழை உலக அளவில் உயர்த்தினார். 2007, 2009 ஆகிய ஆண்டுகளிலும் சர்வதேச சாம்பியன்ஷிப் போட்டியில் வெற்றி பெற்றார்.

l பல்கேரியாவில் 2010-ல் நடந்த போட்டியிலும், 2012-ல் மாஸ்கோவில் நடந்த போட்டியிலும் வென்று மொத்தம் 5 முறை சாம்பியன் என்ற உலக சாதனை படைத்தார்.

l உலக செஸ் கூட்டமைப்பு சார்பில் 2003-ல் நடத்தப்பட்ட போட்டியில் வெற்றி பெற்று, ‘உலக அதிவேக செஸ் வெற்றி வீரர்’ என்ற பட்டத்தை வென்றார். 2005-ல் அமெரிக்காவில் நடந்த சர்வதேச போட்டியில் 2-ம் இடம் பிடித்தார். 2007 முதல் 2013 வரை உலக தரவரிசை பட்டியலில் உலகின் நம்பர் ஒன் வீரராக இருந்த பெருமைக்குரியவர்.

l அர்ஜுனா விருது, பத்மவிபூஷண், பத்மபூஷண், பத்ம, தேசிய குடிமகன் விருது, சோவியத் லேண்ட் விருது, ராஜீவ் காந்தி கேல் ரத்னா விருது, 1997, 1998, 2003, 2004, 2007, 2008-ம் ஆண்டுகளுக்கான ‘செஸ் ஆஸ்கர்’ உள்ளிட்ட ஏராளமான விருதுகளைப் பெற்றுள்ளார்.

l ரஷ்யர்கள் மட்டுமே ஆதிக்கம் செலுத்திவந்த செஸ் விளையாட்டில், இந்திய ஆற்றலின் பெருமையை நிலைநாட்டியவர். செஸ் ரசிகர்களால் ‘விஷி’ என்று அன்புடன் அழைக்கப்படும் உலக சாதனை வீரரான விஸ்வநாதன் ஆனந்த் தனது வெற்றிப் பயணத்தை இன்றும் தொடர்ந்து கொண்டிருக்கிறார்.