சாம் மானெக்‌ஷா 10

இந்திய ராணுவ வரலாற்றில் சாதனை படைத்த ‘பீல்டு மார்ஷல்’ சாம் மானெக்‌ஷா (Sam Manekshaw) பிறந்த தினம் இன்று (ஏப்ரல் 3). அவரைப் பற்றிய அரிய முத்துக்கள் பத்து:

 பஞ்சாப் மாநிலம் அமிர்த சரஸில் (1914) பிறந்தவர். இவரது முழு பெயர், சாம் ஹோர்மூஸ்ஜி பிரேம்ஜி சாம்பகதூர் ஜம்ஷெட்ஜி மானெக்‌ஷா.

  தந்தைபோல மருத்துவம் படிக்க விரும்பினார். ஆனால், இங்கிலாந்து சென்று படிக்க வீட்டில் அனுமதிக்கவில்லை. கோபம் கொண்டு, டேராடூன் ராணுவக் கல்லூரிக்கு விண்ணப் பித்தார். முதன்முதலாக அந்த ராணுவப் பயிற்சிக்கு தேர்ந்தெடுக்கப்பட்ட 40 பேரில் இவரும் ஒருவர். 1934-ல் ராணுவ சேவையைத் தொடங்கினார்.

 பர்மாவில் 1942-ல் பணியாற்றியபோது 2-ம் உலகப் போர் மூண்டது. ஜப்பானின் தாக்குதல்களை எதிர்கொண்டு போராடிய இவரது உடலில் 9 குண்டுகள் பாய்ந்தன. படுகாயம் அடைந்தபோதும் தொடர்ந்து போராடி, போர்முனையைக் கைப்பற்றும் முயற்சியில் வெற்றிகண்டார். இவரை பாராட்டி பிரிட்டிஷ் இந்திய ராணுவத் தளபதி டி.டீ.கோவன், தனது மிலிட்டரி கிராஸ் பதக்கத்தை கழற்றி போர்முனையிலேயே இவருக்கு அணிவித்தார்.

 உடல்நலம் தேறியதும் குவெட்டாவில் உள்ள பணியாளர் கல்லூரிக்கு பயிற்சியாளராக அனுப்பப்பட்டார். வீரர்கள் இவரை ‘சாம் பகதூர்’ (துணிச்சல்காரர்) என்றனர்.

 2-ம் உலகப் போர் முடிந்த பிறகு 10 ஆயிரம் போர்க் கைதிகளின் மறுவாழ்வுக்கு உதவினார். இந்தியப் பிரிவினைக்குப் பிறகு 1948-ல் காஷ்மீரில் ஊடுருவிய பாகிஸ்தான் ராணுவத்தை தனது அசாதாரணமான போர்த் திறன், வியூகத்தால் தோற்கடித்தார்.

 1962-ல் சீனப் போரில் இந்தியா பின்வாங்கியபோது படைப்பிரிவுக்கு இவரை தலைமை ஏற்கச் சொன்னார் ஜவஹர்லால் நேரு. சீனப் படை மேலும் முன்னேறுவதை இவர் வெற்றிகரமாகத் தடுத்தார். 1969-ல் இந்தியாவின் ராணுவத் தலைமைத் தளபதியானார்.

  1971-ல் இந்தியா பாகிஸ்தான் 2-வது போரின்போது, 14 நாட்களில் பாகிஸ்தானை சரணடையச் செய்தார். இது இந்திய ராணுவத்தின் மிகப் பெரிய, மிக விரைவான வெற்றியாகும். 93 ஆயிரம் பாகிஸ்தான் ராணுவத்தினர் போர்க் கைதிகளாக பிடிக்கப்பட்டனர்.

 அடுத்து ஏற்பட்ட சிம்லா ஒப்பந்தம் மூலம் வங்கதேசம் உருவானது. வங்கதேசத்தினர் இவரை பெரிதும் போற்றினர். 1968-ல் இவருக்கு பத்மபூஷண், 1972-ல் பத்மவிபூஷண், 1973-ல் பீல்டு மார்ஷல் பட்டம் வழங்கப்பட்டன.

 40 ஆண்டு கால ராணுவ வாழ்க்கையில் கர்னல், பிரிகேடியர், மேஜர் ஜெனரல், லெப்டினன்ட் ஜெனரல் என படிப்படியாக பல ரேங்க் பெற்றவர். நிர்வாகத்திலும் சிறந்து விளங்கினார். நீதி, நேர்மையுடன் செயல்பட்டார். ராணுவத்தில் இருந்த பிரச்சினைகளுக்கு உறுதியாக, நியாயமான முறையில் தீர்வு கண்டார்.

 ஓய்வு பெற்ற பிறகு பல்வேறு நிறுவனங்களின் தலைவராகப் பணியாற்றினார். இந்திய ராணுவத்தில் ஒப்பற்ற சேவையாற்றிய பீல்டு மார்ஷல் சாம் மானெக்‌ஷா 94 வயதில் (2008) மறைந்தார்.