ரிச்சர்ட் அட்டன்பரோ 10

* இங்கிலாந்தில் கேம்பிரிட்ஜில் பிறந்தார் (1923). தந்தை அறிஞர் கல்வியாளர். வைக்ஸ்டன் பாய்ஸ் கிராமர் பள்ளியில் பயின்றார்.

* நடிப்பதில் ஆர்வம் இருந்ததால், ‘ராயல் அகாடமி ஆஃப் டிராமடிக் ஆர்ட்டில்’ நாடகவியல் பயின்றார். இரண்டாம் உலகப் போரில் ராயல் விமானப் படையில் பணியாற்றினார். யுத்தம் நடைபெறும் இடங்களில் படம்பிடிக்கும் குழுவினருடன் இணைந்து பணியாற்றியுள்ளார்.

* முதன்முதலில் நாடக நடிகராகத் தன் தொழில் வாழ்வைத் தொடங்கினார். அகதா கிறிஸ்டியின் நாவலைத் தழுவி தயாரிக்கப்பட்ட ‘தி மவுஸ்ட்ராப்’ நாடகம் இவரைப் பிரபலமாக்கியது. 1942-ல் ‘இன் விச் வி செர்வ்’ என்ற படத்தில் முதன்முறையாக நடித்தார்.

* அடுத்து, ‘நியு அட்வென்சர்ஸ்’, ‘ஏ மேட்டர் ஆஃப் லைஃப் அண்ட் டெத்’ உள்ளிட்ட திரைப்படங்களில் நடித்தார். இருப்பினும் 1947-ல் இவர் நடித்த ‘பிரைட்டன் ராக்’ படம்தான் இவருக்கு நடிகராக அங்கீகாரம் பெற்றுத் தந்தது. 1950-களின் இறுதியில் ‘பீவேர் ஃபிலிம்ஸ்’ என்ற தயாரிப்பு நிறுவனத்தைத் தொடங்கினார்.

* ‘பிரயான் ஃபோர்ஸ்’, ‘தி லீக் ஆஃப் ஜென்டில்மேன்’, ‘தி ஆங்க்ரி சைலன்ஸ்’ மற்றும் ‘விசில் டவுன் தி வின்ட்’ உள்ளிட்ட பல படங்களைத் தயாரித்தார். இவரது ‘பிரைவேட் புரோகிரஸ்’, ‘தி சான்ட் பெபிள்ஸ்’, ‘செயான்ஸ் ஆன் ஏ வெட் ஆஃப்டர்நூன்’ உள்ளிட்ட பல படங்கள் குறிப்பிடத்தக்கவை.

* ‘தி கிரேட் எஸ்கேப்’ என்ற படத்தில் 1963-ல் நடித்தார். இது பெரும் வெற்றி பெற்று, வசூலில் ஆறாவது மிகப் பிரபலமான நடிகர் என்ற அந்தஸ்துக்கு இவரை உயர்த்தியது. 1969-ல் ‘ஓ வாட் ஏ லவ்லி வார்’ என்ற படம் மூலம் இயக்குநராக அறிமுகமானார். 1977-ல் சத்தியஜித் ரேயின் ‘சதரன்ஞ் கே கிலாடி’ படத்தில் நடித்தார்.

* மகாத்மா காந்தியின் வாழ்க்கை வரலாற்றை 1982-ல் ‘காந்தி’ என்னும் பெயரில் திரைப்படமாக எடுத்தார். இது உலகம் முழுவதிலும் மகத்தான வெற்றிபெற்றது. இந்தப் படத்துக்காக 2 ஆஸ்கர் விருதுகளை வென்றார். மேலும் சிறந்த திரைப்படம், சிறந்த நடிகருக்கான விருது, சிறந்த எடிட்டிங் உள்ளிட்ட மொத்தம் 8 ஆஸ்கர் விருதுகளையும், 4 பாஃப்ட்டா விருதுகள், 4 கோல்டன் குளோப் விருதுகள் உள்ளிட்ட ஏராளமான விருதுகளையும் இப்படம் பெற்றது.

* நீண்ட இடைவெளிக்குப்பின் ‘ஜுராசிக் பார்க்’ படத்தில் நடித்தார். தொடர்ந்து ‘மிராக்கிள் ஆன் தர்ட்டிஃபோர்த் ஸ்டீட்’, ‘ஹாம்லட்’, ‘எலிஸபெத்’ உள்ளிட்ட படங்களில் நடித்தார். 1992-ல் ‘சாப்ளின்’ திரைப்படத்தை இயக்கினார்.

* நாடு, மதம், இனம், ஜாதி, நிறம் எந்த பாகுபாடும் இல்லாமல் மனிதர்கள் அனைவருக்கும் கல்வியும் சுகாதாரமும் பெறும் உரிமை உள்ளது என்பதை மனதார நம்பிய இவர், உலகளாவிய பல்வேறு சேவை மையங்களோடு இணைந்து சேவைகள் புரிந்துவந்ததோடு, அவற்றுக்குத் தாராளமாக நிதி உதவியும் வழங்கினார்.

* நடிகர், திரைப்பட இயக்குநர், தயாரிப்பாளர், தொழிலதிபரும் அரை நூற்றாண்டுக்கும் மேலாக ஹாலிவுட்டில் வெற்றிகரமாக இயங்கி வந்தவரும், உலகப் புகழ்பெற்ற பன்முகப் பரிமாணம் கொண்ட ஆளுமையுமான இவர், 2014-ம் ஆண்டு தனது 91-வது வயதில் மறைந்தார்.