நித்யஸ்ரீ மகாதேவன் 10

பிரபல கர்னாடக இசைப் பாடகி

பிரபல கர்னாடக இசைப் பாடகியும், இசைமேதை டி.கே.பட்டம்மாளின் பேத்தியுமான நித்யஸ்ரீ மகாதேவன் (Nithyashree Mahadevan) பிறந்த தினம் இன்று (ஆகஸ்ட் 25). அவரைப் பற்றிய அரிய முத்துக்கள் பத்து:

*திருவையாற்றில் பாரம்பரியம் மிக்க இசைக் குடும்பத்தில் பிறந்தவர் (1973). டி.கே.பட்டம்மாளின் மகன் வயிற்றுப் பேத்தி. பிரபல மிருதங்க வித்வான் பாலக்காடு மணி ஐயரின் மகள் வயிற்றுப் பேத்தி. முதலில் தன் தாயாரிடமே சங்கீதம் பயின்றார். பின்னர் பாட்டி டி.கே.பட்டம்மாளிடம் கற்றார்.

*குடும்பம் முழுவதும் இசையால் நிரம்பியிருந்த சூழலில் வளர்ந்த சிறுமியும் இயல்பிலேயே நன்றாகப் பாடினார். ‘என் பாட்டி பட்டம்மாள் எங்களோடு விளையாடுவார், பாடுவார், கற்றுக்கொடுப்பார். எங்கள் அனைவரிடமும் ஒழுக்கத்தையும் பணிவையும் விதைத்தார். சாதகம் என்று வரும்போது கடுமையாக இல்லாமல், ஆனால் அதே சமயத்தில் கண்டிப்புடன் நடந்துகொள்வார்’ என்று நித்ய குறிப்பிட்டிருக்கிறார்.

*சங்கீதக் கச்சேரிகள், சாதகங்களோடு பள்ளிப் படிப்பையும் முடித்தார். பின்னர் சென்னை எஸ்.ஐ.இ.டி. கல்லூரியில் வணிகவியலில் இளங்கலைப் பட்டம் பெற்றார். தனது 16-வது வயதில் செம்மொழி இசை இளைஞர் சங்கத்துக்காகப் பாடினார். அதுவே இவரது முதல் தனி மேடைக் கச்சேரி.

*1991-ல் கபாலி ஃபைன் ஆர்ட்சில் நடைபெற்ற இவரது கச்சேரி நல்ல வரவேற்பு பெற்று இவரைப் பிரபலப்படுத்தியது. தனது பாட்டியைப் போலவே பாபநாசம் சிவன் மற்றும் கோபாலகிருஷ்ண பாரதி ஆகியோரின் பாடல் தொகுப்புகளைப் பாடினார்.

‘அப்பா அவ்வளவு சீக்கிரத்தில் பாராட்டிவிட மாட்டார். எனது முதல் விமர்சகரே அவர்தான், அவரிடம் பாராட்டு பெறுவது மிகப் பெரிய விஷயம்’ என்று தந்தையைப் பற்றிக் கூறியுள்ளார். 100-க்கும் மேற்பட்ட இசை ஆல்பங்களை வெளியிட்டுள்ளார்.

* உள்ள முக்கிய சபாக்கள் அனைத்திலும் பாடியுள்ளார். அமெரிக்கா, கனடா, ஆஸ்திரேலியா, ஜெர்மனி, பிரான்ஸ், சிங்கப்பூர், மலேசியா உள்ளிட்ட பல நாடுகளில் கச்சேரிகளை நடத்தியுள்ளார். பம்பாயிலும், ஹைதராபாத்திலும் நடைபெற்ற சர்வதேச இசை விழாக் களிலும், சங்கீத நாடக அகாடமி விருது நிகழ்ச்சியிலும் பாடியுள்ளார்.

* பக்திப் பாடல்கள், தேசப்பக்திப் படல்களையும் பாடியுள்ளார். தனித்துவம் வாய்ந்த தன் குரலால் உலகம் முழுவதும் ரசிகர்களைப் பெற்றுள்ளார். இந்தியா சுதந்திரம் அடைந்த 50 ஆண்டுகள் நிறைவடைந்த கொண்டாட்டங்களில் பல கச்சேரிகளில் தேசபக்திப் பாடல்களைப் பாடினார்.

*1990-ல் ‘ஜீன்ஸ்’ படத்தில் ‘கண்ணோடு காண்பதெல்லாம்’ பாடல் மூலம் திரையுலகில் கால் பதித்தார். இந்தப் பாடலின் வெற்றியைத் தொடர்ந்து பல படங்களில் பாடினார். ‘மின்சாரக் கண்ணா’, ‘சவுக்கியமா கண்ணே சவுக்கியமா’, ‘மன்மத மாசம்’, ‘கும்பகோணம் சந்தையிலே’, ‘தாய் தின்ற மண்ணே’ உள்ளிட்ட இவர் பாடிய பாடல்கள் அனைத்துமே வெற்றிபெற்றன. தெலுங்கு, கன்னடம் உள்ளிட்ட பல மொழித் திரைப்படங்களிலும் பாடினார்.

*‘யுவகலா பாரதி’, ‘இன்னிசை மாமணி’, ‘இன்னிசை ஞான வாரிதி’, ‘நவரச கான நாயகி’, ‘கலைமாமணி’, ‘சிவன் இசைச் செல்வி’, ‘சங்கீத சிகாமணி’, ‘இசைப் பேரொளி’ உள்ளிட்ட பல பட்டங்களையும் விருதுகளையும் பெற்றுள்ளார். சத்யபாமா பல்கலைக்கழகம் இவருக்கு முனைவர் பட்டம் வழங்கி கவுரவித்தது.

*கர்னாடக இசை ஜாம்பவான்களும், சங்கீத வல்லுநர்களும் நிறைந்த குடும்பத்தில் பிறந்து, இசையையே சுவாசித்து வளர்ந்த நித்ய மகாதேவன், இன்று 43வது வயதை நிறைவு செய்கிறார். சுறுசுறுப்பாக இசை உலகில் வலம் வருகிறார்.