பங்கஜ் மல்லிக் 10

இந்தி, வங்கமொழி இசையமைப்பாளர்

புகழ்பெற்ற இந்தி, வங்கமொழித் திரைப்பட இசையமைப்

பாளர், பாடகர், நடிகர், பாடலாசிரியர் எனப் பன்முகப் பரிமாணம் கொண்ட பங்கஜ் மல்லிக் (Pankaj Mullick) பிறந்த தினம் இன்று (மே 10). அவரைப் பற்றிய அரிய முத்துக்கள் பத்து:

* கல்கத்தாவில் (1905) பிறந்தார். தந்தை பாரம்பரிய வங்க இசைக் கலைஞர். துர்காதாஸ் பந்தோபாத்யாயிடம் இந்திப் பாரம்பரிய இசையைக் கற்றார். பள்ளிப் படிப்புக்குப் பிறகு, கல்கத்தா பல்கலைக்கழகத்தின் ஸ்காடிஷ் சர்ச் கல்லூரியில் பயின்றார்.

* இசைக் கலைஞர் ஆகவேண்டும் என்று சிறுவயதிலேயே முடிவு செய்தார். க்யால், த்ருபத், டப்பா மற்றும் பிற சாஸ்திரிய சங்கீதத்தில் ஆழ்ந்த ஞானம் பெற்றிருந்தார். படிப்பு முடிந்தவுடன், ரவீந்திரநாத் தாகூரின் உறவினர் தீனேந்திரநாத் தாகூரைச் சந்தித்தார். அவரிடம் ரவீந்திர சங்கீத் பயின்றார்.

* இப்பாடல்களை முதன்முதலாக வர்த்தக ரீதியாக ரெக்கார்டிங் செய்தார். அப்போது அவருக்கு வயது 18. தாகூரின் கவிதைகளை பிரபலப்படுத்தினார். 1927-ல் கல்கத்தா வானொலி நிலையம் தொடங்கப்பட்ட ஒரு மாதத்தில் அங்கு சேர்ந்தார். இவர் சங்கீதம் கற்றுத் தரும் இசைப் பாடங்கள் நிகழ்ச்சி அதில் ஞாயிறுதோறும் ஒலிபரப்பானது. இது ரசிகர்கள் மத்தியில் பெரும் வரவேற்பை பெற்றது.

* 50 ஆண்டுகாலம் வானொலி நிலையத்தின் பிரிக்க முடியாத அங்கமாகத் திகழ்ந்தார். இன்றும் ஒலிபரப்பாகிவரும், அமரத்துவம் வாய்ந்ததாகப் போற்றப்படும் ‘மகிஷாசுரமர்த்தினி’ நிகழ்ச்சிக்கு இசையமைத்தார். இது வங்க கலாச்சாரத்தின் ஒரு பகுதியாகவும், துர்கா பூஜைக்கு இணையாகவும் மாறியது.

* மவுனப் படமாக இருந்த திரைப்பட உலகில் 1931-ல் தனதுபயணத்தைத் தொடங்கினார். தாகூரின் பாடல்களை சினிமாவிலும் புகுத்தி, சாதாரண மக்களிடம் கொண்டு சேர்த்தார். தனது பாடல் களுக்கு இசை தந்தவர் என தாகூர் இவரைப் போற்றியுள்ளார்.

* ‘நேமேசே ஆஜ் ப்ர்தோம் பாதல்’ இவரது முதல் திரைப்படம். சில படங்களில் நடித்தும் உள்ளார். நல்ல குரல் வளமிக்கவர். பல படங்களில் தான் இசையமைத்த பாடல்களைத் தானே பாடியும் உள்ளார்.

* எழுதும் திறனும் கொண்டிருந்த இவர், பல இசை நூல்களை எழுதி வெளியிட்டார். வங்காளம், இந்தி, உருது, தமிழ் உள்ளிட்ட பல்வேறு மொழிகளில் 100-க்கும் மேற்பட்ட திரைப்படங்களுக்கு இசையமைத்துள்ளார். ஏராளமான பாடல் இசைத்தட்டுகளை வெளியிட்டுள்ளார்.

* பாடல்களை இயற்றும் திறனும் பெற்றிருந்தார். தனது 50 ஆண்டுகால இசைப் பயணத்தில் ஏராளமான பக்தி, தேசபக்திப் பாடல்கள், திரைப்படப் பாடல்கள் உட்பட 5000-க்கும் மேற்பட்ட பாடல்களை எழுதியுள்ளார். பல பாடல்களைத் தானே எழுதி, இசையமைத்துப் பாடியுள்ளார்.

* இந்தியத் திரையிசையில் அதுவரை நடிகரே பாடிவந்த நிலையை மாற்றி, பின்னணிப் பாடல் முறையைத் தொடங்கிவைத்தவர்களில் முதன்மையானவர் இவர். 1970-ல் பத்ம விருது, 1972-ல் தாதாசாகேப் பால்கே விருது பெற்றார். நாட்டில் தொலைக்காட்சி ஆரம்பிக்கப்பட்டபோது அதன் தொடக்கப் பாடலைப் பாட இவர் அழைக்கப்பட்டார். 2006-ல் இவரது பெயரில் தபால்தலை வெளியிட்டது.

* இந்திய சாஸ்திரிய இசை நிபுணரும், மாயமந்திரம் செய்யும் குரலுக்குச் சொந்தக்காரர் எனப் போற்றப்பட்டவரும், இந்தியத் திரையுலகுக்கு தனது இசையால் மகத்தான பங்களிப்புகளை வழங்கியவருமான பங்கஜ் மல்லிக் 73-வது வயதில் (1978) மறைந்தார்.