புரட்டாசி மாத நட்சத்திரப் பலன்கள் :  திருவாதிரை முதல் மகம் நட்சத்திரம் வரை :  (செப்டம்பர் 18 முதல் அக்டோபர் 17ம் தேதி வரை) 

ஜோதிடர் ஜெயம் சரவணன்

திருவாதிரை நட்சத்திரம்-

மனதில் அமைதி நிலவும் மாதம் இது.

பெரிய பெரிய கற்பனைகளும் கனவுகளும் கொஞ்சம்கொஞ்சமாக செயல்பாட்டுக்கு வரும். சொந்த வீடு எனும் கனவு இப்போது நிறைவேறும். ஒருசிலர் சொத்துக்களை விற்று புது சொத்து வாங்கும் சந்தர்ப்பம் கூடிவரும்.

வேலையில் இடமாற்றம் அல்லது துறை மாற்றம், புதிய வேலை வாய்ப்புகள் என மாறுதல் சம்பந்தமான நிகழ்வுகள் நடக்கும். தொழில் நிதானமான வளர்ச்சியோடு செல்லும். வங்கிக்கடன் தடையில்லாமல் கிடைக்கும்.

சொத்து தொடர்பான வழக்குகள் முடிவுக்கு வருவது தள்ளிப்போகும். நீங்கள் விட்டுக்கொடுக்க முன் வந்தால் பிரச்சினை தீர வழிகிடைக்கும். புதிய நபர்களின் தொடர்பு ஏற்படும். ஆனால் அவர்களின் ஆசை வார்த்தைக்கு மயங்கிவிடாதீர்கள். அயல்நாட்டில் இருக்கும் நண்பர்களால் உதவி கிடைக்கும். கணவன் மனைவி மனம் விட்டுப் பேசினால் பிரச்சினைகள் தீரும். மாறாக வீம்பாக இருந்தால் அது வம்பாகமாறும்.

பெண்களுக்கு- அடுத்தவரை உதாரணம் காட்டிப் பேசுவதை நிறுத்துங்கள். இது பிரச்சினையை தீர்க்க உதவாது. மேலும் பெரிதாக்கும். யதார்த்தத்தை உணர்ந்து மனம் விட்டுப் பேசுங்கள். எளிதாக பிரச்சினைகள் தீரும். இது குடும்பத்திற்கு மட்டுமல்ல பணிபுரியும் இடத்திற்கும் பொருந்தும். ஆரோக்கியத்தில் அக்கறை காட்ட வேண்டிய நேரம் இது.

மாணவர்களுக்கு- கவனம் திசை மாறும். தேவையற்ற சிந்தனைகள் கல்வியை பாதிக்கும்.மனக் கட்டுப்பாடு அவசியம்.

கலைஞர்களுக்கு- எந்த வாய்ப்பும் எளிதானதல்ல என்பதை உணருங்கள். சிறிய வாய்ப்பும் பின்னாளில் பெரிய சாதனைகளைச் செய்யும் கருவியாக மாறும் என்பதை தெரிந்து கொண்டாலே வெற்றியை நெருங்கிவிட்டீர்கள் என்று அர்த்தம்.

பொதுப்பலன்- வயிற்றுப்புண், வாயுத்தொல்லை, ஜீரணக்கோளாறு போன்ற பிரச்சினைகள் வர வாய்ப்பு உண்டு. ஒரு சிலருக்கு கண் நோய் பிரச்சினை, பார்வை பிரச்சினைகள் வரவும் வாய்ப்பு உண்டு.

வணங்க வேண்டிய தெய்வம்- கும்பகோணம் அய்யாவாடி மகா பிரத்தியங்கரா தேவியை தரிசனம் செய்யுங்கள், முயற்சிகள் அனைத்தும் வெற்றியாகும்.

சந்திராஷ்டம தினம்- புரட்டாசி -20 (செப்டம்பர் -7)

********************************************

புனர்பூசம் நட்சத்திரம்-

ஆர்வம் குறையாமல் இந்த மாதம் முழுவதும் உங்கள் முயற்சிகளில் முழுமூச்சாக ஈடுபடுவீர்கள்.

சற்று கடினமாக இருந்தாலும் கடைசி நேரத்தில் வெற்றியைக் காண்பீர்கள். மனதில் அசாத்திய தைரியம் உண்டாகும். எதிரிகள் பதுங்குவார்கள். வெளிநாட்டில் வசிப்போருக்கு இப்போது குடியுரிமை சம்பந்தபட்ட விஷயங்கள் சாதகமாகும்.

வேலை பார்ப்பவருக்கு அலுவலகத்தில் இருந்த அழுத்தங்கள் குறையும். சக ஊழியர்களின் எதிர்ப்புகள் அகன்று நிலைமை சகஜமாகும். மேலதிகாரியின் ஆதரவு கிடைக்கும். விரும்பிய இடமாற்றம், பதவி உயர்வு இப்போது கிடைக்கும்.

தொழிலில் கடன் சுமை குறைக்கும்படி புதிய வழிமுறைகளைக் கையாண்டு கடன் ஓரளவு குறையவும் வாய்ப்பு உண்டு. புதிய கடன் வாங்கும் முயற்சி வெற்றியடையும். தரகு தொழில், கமிஷன் ஏஜெண்டுகள் நல்ல லாபம் பார்ப்பார்கள். வேலை பார்த்துக் கொண்டிருப்பவர்கள் முதலாளியாக மாறும் நேரம் வந்துவிட்டது.

பெண்களுக்கு- வீண் செலவுகளைக் குறைத்தாலே கையிருப்பு அதிகமாகும். ஆடம்பரப் பொருட்கள் வாங்கும் எண்ணம் அதிகமாகும். பணத்தை கையாளும் வேலையில் இருப்பவர்கள் அவற்றில் கவனமாக இருக்கவும். இல்லை என்றால் உங்கள் பணத்தை தண்டம் கட்ட வேண்டிய சூழ்நிலை உண்டாகும்.

மாணவர்கள்- பயிலும் கல்வியோடு கூடுதல் கல்வி பயிலும் ஆர்வம் உண்டாகும். குறைந்தபட்சம் மூன்றாவது மொழியாக அயல்நாட்டு மொழி கற்கும் ஆர்வம் உண்டாகும். கல்வியில் எதிர்பார்த்த முன்னேற்றம் கிடைக்கும்.

கலைஞர்கள்- குழுவினர் ஆதரவு பெருகும். ஏதாவது பொது சேவை செய்யும் நிறுவனங்களிலிருந்து கௌரவப் பதவி தேடிவரும். நண்பர்கள் உதவியோடு புதிய ஒப்பந்தங்கள் உண்டாகும்.

பொதுப்பலன்- விலை உயர்ந்த பொருட்களை கையாளும்போது கவனமாக இருங்கள். வயிறு மற்றும் பின் தலையில் வலி வந்து நீங்கும்.

வணங்க வேண்டிய தெய்வம்- ஶ்ரீராமர் பட்டாபிஷேகம் படத்தை வீட்டில் வைத்து வணங்கி வாருங்கள். பலவிதமான அற்புதங்கள் உங்கள் வாழ்வில் நடக்கும்.

சந்திராஷ்டம தினம்- புரட்டாசி-21 (செப்டம்பர்-8)

**************************************

பூசம் நட்சத்திரம்-

கவலைகள் கரைந்து மகிழ்ச்சி பொங்கும் மாதம் இது.

ஒன்றிரண்டு காரியங்கள் தாமதம் ஆகியிருந்தாலும் இந்த மாதம் அந்த தாமதங்கள் அனைத்தும் அகன்று வெற்றிக்கனியை ருசிப்பீர்கள். திருமணம் ஆகாதவர்களுக்கு இப்போது திருமணம் உறுதியாகவும். குழந்தை பாக்கியம் எதிர்பார்த்தவர்களுக்கு இப்போது குழந்தை பாக்கியம் கிடைக்கவும் வாய்ப்புகள் உண்டாகும்.

உத்தியோகத்தில் பதவி உயர்வு, வேறு நல்ல நிறுவனத்தில் வேலை கிடைப்பது., சம்பள உயர்வு முதலானவை கிடைக்கும்.நின்று போன வீட்டு வேலைகள் இப்போது நிறைவடைந்து புதுமனை புகுவிழா நடத்தும் வேளை வந்துவிட்டது. இருக்கும் வீட்டை விட ஆடம்பரமான வீட்டை வாங்குதல் அல்லது இருக்கும் வீட்டை புதுப்பித்தல் நடைபெறும்.

தொழிலில் நல்லநல்ல வாய்ப்புகளும் ஒப்பந்தங்களும் மன நிறைவைத் தரும். அயல்நாடு செல்லும் முயற்சி வெற்றியடையும். உறவுகள் வகையில் இருந்த பகை மறந்து ஒற்றுமை ஏற்படும். அரசு வகை ஆதாயம் கிடைக்கும். ஒருசிலருக்கு அரசு வேலை கிடைக்கும். வங்கிக் கடன் எளிதில் கிடைக்கும். ஒருசிலர் பழைய கடனை அடைத்து புதிய கடன் வாங்கி தொழிலை இன்னும் மேம்படுத்தும் வாய்ப்பு உண்டாகும். புதிய முதலீடுகள் செய்யும் எண்ணம் உண்டாகும். அந்தத் திட்டங்கள் அனைத்தும் நிறைவேறும்.

பெண்களுக்கு- மகிழ்ச்சி..மகிழ்ச்சி...மகிழ்ச்சி! இதைத் தவிர வேறு எதுவும் சொல்லத் தோன்றவில்லை. இதுவரை இருந்த ஒரு சில பிரச்சினைகளும் முடிவுக்கு வரும். அரசு வேலை கிடைக்கும். பதவி உயர்வு உண்டு, வீட்டுக்குத் தேவையான உபகரணங்கள் வாங்குவீர்கள். தோல் பொருட்கள் (ஹேண்ட்பேக், பர்ஸ், காலணிகள்) போன்றவை வாங்குவீர்கள்.

மாணவர்களுக்கு- வெளிநாட்டில் கல்வி பயிலும் வாய்ப்பு உண்டாகும். எதிர்பார்த்த கல்வி உதவித் தொகை கிடைக்கும்.

கலைஞர்களுக்கு- எல்லா வாய்ப்பும் நன்மை தரக்கூடியதாகவே அமையும். முடிந்தவரை சம்பாதிப்பதை எல்லாம் முதலீடுகளாக மாற்றிக்கொள்ளுங்கள். புதிய நட்புக்களால் நிறைய நன்மைகள் உண்டாகும்.

பொதுப்பலன்- வயிறு, முதுகுவலி, பல்வலி, அதிக ரத்த அழுத்தம் போன்ற பிரச்சினைகள் வரலாம். கவனம் தேவை.

வணங்க வேண்டிய தெய்வம் - சக்தி வடிவான அம்மன் ஆலயங்கள், மற்றும் சக்கரத்தாழ்வார் வழிபாடு இன்னும் நிறைய நன்மைகள் நடக்கும்.

சந்திராஷ்டம தினம் -புரட்டாசி - 22 (செப்டம்பர் - 9)

************************************************************

ஆயில்யம் நட்சத்திரம் -

பொருளாதாரத்தில் ஏற்றம் பெறும் மாதம் இது.

உங்கள் பொருளாதார நிலைமையை நினைத்து கவலைப்பட்டுக்கொண்டிருந்தீர்கள். இனி இந்த கவலையெல்லாம் அவசியமே இல்லை. தேவையான பணம் சரியான நேரத்தில் வந்து சேரும், நின்றுபோன பாக்கியெல்லாம் இப்போது வசூலாகும்.

சில வியாபார விஷயங்களை பேசியே சாதிப்பீர்கள். தொழிலில் நல்ல முன்னேற்றம் உண்டு. வெளி நபர் ஒருவரால் மிகப்பெரிய உதவி கிடைக்கும். எப்போதோ பேசிவைத்த தொழில் ஒப்பந்தம் இப்போது திடீரெனக் கிடைக்கும்.

வேலையில் நிம்மதியும் மனநிறைவும் உண்டாகும், உங்கள் பேச்சுக்கு இப்போது மரியாதை கிடைக்கும். திடீர் பணவரவு, அதிர்ஷ்ட வாய்ப்புகள், இன்சூரன்ஸ் தொகை என ஏதாவது தனவரவு உண்டு. திருமணம் நிச்சயம் ஆகும். குலதெய்வ வழிபாடு செய்வீர்கள். புத்திர பாக்கியம் உண்டாகும், புதிய முயற்சிகள் யாவும் வெற்றியாகும்.

பெண்களுக்கு - குழந்தைகளின் எதிர்காலம் கருதி சேமிப்பு செய்யத் துவங்குவீர்கள், இதுவரை திருமணம் ஆகாத பெண்களுக்கு இந்த மாதம் திருமணம் உறுதியாகும். பெற்றோர் ஆசியுடன் விரும்பிய மணவாழ்க்கை அமையும். அரசு வேலை கிடைக்கும். ஆசிரியர் வேலை கிடைக்கவும் வாய்ப்பு உண்டு.

மாணவர்களுக்கு - அபார ஞாபக சக்தி உண்டாகும். இதுவரை புரியாமல் இருந்த பாடங்களுக்கு ஒருவர் உதவியுடன் இப்போது புரிந்து கொள்ள சந்தர்ப்பம் உண்டாகும்.புதிய கல்வி, அயல்மொழி கற்கும் ஆர்வம் ஏற்பட்டு அது தொடர்பான கல்வி மையங்களில் சேருவீர்கள்.

கலைஞர்களுக்கு - மனநிறைவு, நிம்மதி, திருப்தி உண்டாகும். நீண்ட நாட்களாக வராமல் இருந்த பணம் இப்போது தேடி வரும். அரசின் ஆதரவோடு வெளிநாடு செல்லும் வாய்ப்பும், ஏதாவது பதவி அல்லது பொறுப்புகளும் கிடைக்கும்.

பொதுப் பலன் - அதிக அலைச்சல் வேண்டாம். நீர்ச்சத்து குறைபாடு வரும் வாய்ப்பு உண்டு. தோல் நமைச்சல், கால் பாதத்தில் வலி போன்றவை வரும்.

வணங்க வேண்டிய தெய்வம் - ரத்தின சபையான திருவாலங்காடு வடாராண்யஸ்வரர் ஈசனை தரிசனம் செய்யுங்கள். துர்கை மற்றும் அம்மனை வழிபடுங்கள்.

சந்திராஷ்டம தினம் -புரட்டாசி - 23 (செப்டம்பர் -10 )

*******************************************

மகம் நட்சத்திரம் -

பிரச்சினைகள் தீர்ந்து நிம்மதி அதிகரிக்கும் மாதம் இது.

கடந்த மாதத்தில் இருந்த பிரச்சினைகளில் ஓரளவு இந்த மாதம் தீரும். ஆரோக்கிய பிரச்சினைகளும் கட்டுக்குள் இருக்கும். வாகனப் பழுது இந்த மாதமும் தொடரும். வேறு வாகனம் மாறும் சிந்தனை மேலோங்கும். அதேமாதிரி வீட்டுச் செலவுகளும் கட்டுக்கடங்காமல் இருக்கும்.

உத்தியோகத்தில் சிறுசிறு சலசலப்புகள் தொடரும். ஆனால். எதுவும் உங்கள் கைமீறிப் போகாது. ஏதாவதொரு வகையில் இந்த பிரச்சினைகளைக் கையாண்டு உங்களை தற்காத்துக் கொள்வீர்கள். தொழிலில் சராசரி போக்கு காணப்படும்.

பணத்தை கையாளும்போது கவனமாக இருங்கள். யாருக்கும் வாக்குறுதி கொடுக்க வேண்டாம். வாக்குறுதியை காப்பாற்ற முடியாது. தொழிலாளர்களிடம் இணக்கமாக இருங்கள். கோபத்தை காட்டினால் பாதிப்பு உங்களுக்குத்தான் என்பதை உணருங்கள். கட்டுமானத்தொழில் செய்வோர் நல்ல முன்னேற்றம் காண்பார்கள். வர்ண வியாபாரம் (பெயிண்ட்) செய்பவர்கள் அதிக ஆர்டர் கிடைத்து மகிழ்ச்சியடைவார்கள்.

பெண்களுக்கு- உணர்ச்சிவசப்பட்டு எடுக்கும் முடிவுகள் எதுவும் நன்மை தராது என்பதை உணருங்கள். வெளியே செல்லும்போது பணம், நகை இவற்றில் கூடுதல் கவனம் தேவை. . பணியிடத்தில் கூடுதல் பணிச்சுமை இருக்கும். புன்முறுவலோடு ஏற்றுக்கொள்ளுங்கள் இல்லையென்றால் உயரதிகாரியின் கோபத்திற்கு ஆளாக நேரிடும்.

மாணவர்களுக்கு- விளையாட்டுத்தனத்தையும் சின்ன சின்ன விஷயங்களில் மனம் திளைப்பதும் போதுமே! இனி பாடங்களில் கவனமாக இருங்கள். இல்லாவிட்டால் ஒரு வருட படிப்பும் வீணாகப்போகும் என்பதை கருத்தில் கொள்ளுங்கள்.

கலைஞர்களுக்கு- திரைத்துறையில் இருப்பவர்களுக்கு நல்ல வாய்ப்புகள் கிடைக்கும். இசை உள்ளிட்ட கலைத்துறையினருக்கு நிறைய ஒப்பந்தங்கள் கிடைக்கும். மகிழ்ச்சியான மாதம்.

பொதுப்பலன்- உணவு விஷயத்தில் கவனமாக இருக்க வேண்டும். அலர்ஜி பிரச்சினை இருப்பவர்கள் கவனமாக இருக்க வேண்டும்.

வணங்க வேண்டிய தெய்வம்- ஶ்ரீரங்கம் அரங்கநாதர் ஆலயத்தில் உடையவர் எனப்படும் ஶ்ரீராமானுஜர் ஜீவ நிலையில் அமர்ந்துள்ள சந்நிதியில், சிறிது நேரம் அமர்ந்து தியானம் செய்யுங்கள். உங்கள் கஷ்டங்கள் யாவும் தீரும்.

சந்திராஷ்டம தினம்- புரட்டாசி -24 ( செப்டம்பர் -11)

*********************************************

ராசி பலன், ஜோதிடத்தில் குறிப்பிடப்படும் பலன்கள் அனைத்தும் ஜோதிடரின் கணிப்புகளே. அவை 'இந்து தமிழ் திசை'யின் கருத்துகள் அல்ல.