இயற்கையின் அதிசயங்களுள் ஒன்று முத்து. மதிப்புமிக்கப் பொருள்களில் ஒன்றாக இருக்கிறது. அதைக் கடலில் வாழும் உயிரினமான சிப்பிதான் உருவாக்குகிறது.

சிப்பியின் ஓடு எந்தப் பொருளால் உருவாக்கப்பட்டிருக்கிறதோ அதே பொருளால்தான் முத்தும் உருவாக்கப்படுகிறது.

முத்து மட்டுமல்ல மெல்லுடலி (Molluscs) உயிரினங்களான நத்தை, கிளிஞ்சல் போன்றவற்றின் ஓடுகளும் அதே பொருளால்தான் உருவாக்கப்பட்டுள்ளன. 
 

அந்த வேதிப்பொருள், நாம் அன்றாட வாழ்வில் பல்வேறு விஷயங்களுக்குப் பயன்படுத்தும் கால்சியம் கார்பனேட்.

மெல்லுடலிகள் உருவாக்கும் அரகோனைட்டின் ஒருவகைதான் நேகர் (Nacre). இதுதான் விலை உயர்ந்த முத்துகளை உருவாக்கும் மந்திரப் பொருள்.
 

மெல்லுடலிகள் அரகோனைட்டை ஒரு குறிப்பிட்ட அடுக்குகளில் பொருத்தி, அதில் புரதங்களைச் செலுத்தி நேக்கர் எனும் கனிமக் கலவையை உருவாக்குகின்றன. 
 

நேக்கரின் சீரான கட்டமைப்புதான் அதன் ஒளிர்வுத் தன்மைக்கும் பளபளப்புக்கும் காரணமாகிறது.
 

ஒளியின் துகள்கள் கெட்டியடைந்த நேக்கரில் மோதும்போது அதன் பல அடுக்குப் படிக அமைப்பில் மோதிச் சிதறுகின்றன. அதனால்தான் முத்து பல வண்ணங்களாக ஒளிர்கிறது.
 

நேக்கர் அழகான பொருள் மட்டுமல்ல. மெலிதானதும் அதேநேரம் வலிமையானதும்கூட. 
 

சிப்பிகள் மட்டுமல்ல, பல மெல்லுடலிகள் நேக்கரைச் சுரக்கின்றன. ஆனால், சிப்பிகள் மட்டும்தான் முத்துகளை உருவாக்குகின்றன.
 

ஏன் சிப்பி மட்டும் முத்துகளை உருவாக்க வேண்டும்? உண்மையில் சிப்பி தன்னை வெளிப் பொருள்களில் இருந்து பாதுகாத்துக் கொள்ளத்தான் நேக்கரை உற்பத்தி செய்கிறது.
 

சிப்பிகளுக்குள் ஒட்டுண்ணியோ அல்லது இடையூறு ஏற்படுத்தும் வெளிப்பொருள்களோ உள்ளே நுழையும்போது உறுத்தலை ஏற்படுத்துகின்றன.
 

அவற்றை எதிர்கொள்ள மேன்டில், கோன்சியோலின் எனும் புரதத்தைச் சுரந்து அவற்றைப் பிடித்துவைத்துக்கொள்ளும். பிறகு அடர்த்தியான நேக்கர் சுரக்க ஆரம்பிக்கும்.

இந்த நேக்கர் பல அடுக்குகளாகச் சுரந்து சிறிது சிறிதாகக் கெட்டியடையும்போது முத்து உருவாகுகிறது.

உண்மையில் முத்து கோள வடிவில் இருப்பது என்பது அபூர்வம்தான். நேகர் இந்த வடிவத்தில்தான் கெட்டியடையும் என்று சொல்ல முடியாது.
 

மனிதர்கள் கோள வடிவத்தில் உள்ள முத்தையே எடுத்துப் பயன்படுத்துகின்றனர். இதனால்தான் அது அபூர்வமானதாகவும் தோன்றுகிறது.

இப்படியாகத் தம்மை பாதிக்க வரும் வெளிப்பொருள்களைப் பிடித்து வைத்துதான் சிப்பிகள் முத்துகளைத் தயாரிக்கின்றன.

மழை வரும்போது சிப்பி தன் வாயைத் திறந்து, ஒரு துளி மழை நீரை விழுங்கும். அதுதான் முத்தாக உருமாறும் என்ற கதையை இனி நம்ப மாட்டீர்கள்தானே? | தகவல்கள்: நன்மாறன் திருநாவுக்கரசு